कुनै एउटा कार्यालय वा प्रदेशमा दर्ता भएको सवारी साधन अन्य प्रदेशमा लगेर त्यहाँ दर्ता गर्नु पर्दा हाल दर्ता रहेको कार्यालयबाट सरुवा सहमती लिनु पर्दछ । उदाहरएको लागि बागमती प्रदेशमा दर्ता भएको मोटरसाईकल लुम्बिनीमा लगेर त्यहीँको नम्बर प्लेट लिएर संचालन गर्नु पर्ने हो भने बागमतीको यातायात कार्यालय गुर्जुधाराबाट सरुवा सहमती लिनु पर्छ ।
विगतमा सवारी साधनहरु अन्चल अनुसार दर्ता हुने हुँदा सरुवा सहमती लाई अञ्चलिकरण पनि भन्ने गरिन्थ्यो वा मोटरसाईकलको ठाउँसारी भन्ने गरिन्थ्यो । जे भने पनि यी सबै एउटै कुरा हुन् ।
त्यस्तै लुम्बिनी, नारायणी, कोशी आदि ठाउँमा दर्ता भई चलिरहेका मोटरसाईकलहरु बागमती प्रदेशमा ल्याई दर्ता गर्नु पर्यो भने ती कार्यालयबाट सरुवा सहमती ल्याएर गुर्जुधाराको यातायात कार्यालयमा सम्पर्क राख्नु पर्छ ।
हाल सरुवा सहमती लैजाँदा कुनै दस्तुर लाग्दैन - निःशूल्क हो ।
अन्यत्रबाट सरुवा सहमती ल्याएर बागमतीमा सरुवा दर्ता गर्दा रु ५००।- दर्ता शूल्क र रु २०।- प्रदुषण शूल्क तिर्नु पर्छ ।
सरुवा सहमती बनाई लैजाँदा
१. आफ्नो मोटरसाईकलको चालु आर्थिक वर्ष सम्मको कर / नविकरण तिरेर ब्लूबुकमा जनाएको हुनु पर्छ । कर/नविकरण बाँकी भए पहिले त्यो काम सकाउनुहोस् ।
२. मोटरसाईकलको फाइलको सबै कागजातहरुको फोटोकपी गर्नुहोस् । फाइल तपाईले बुझेर नलगेको भए कार्यालयमा फाइल खोज्न लगाउनुहोस् । फाइलमा भएका कागजातहरुमा सरुवा सहमती लैजाँदा देहायका कागजातहरु अत्यन्त महत्वपूर्ण छन् ।
- दर्ता कार्ड,
- भन्सार पज्ञापन पत्र,
- भन्सार रसिद
- इन्जिन चेसिसको फोटो
- दर्ता फाराम
- प्रत्येक विक्रीको भ्याट बील
- प्रत्येक नामसारीको नामसारी फाराम
- प्रत्येक रसिदहरु
३. ब्लू बुकको फोटोकपी गर्नुहोस् ।
४. सरुवा सहमती फाराम भरेर त्यसमा रु १०।- को हुलाक टिकट टासेर सबै फोटोकपीहरुलाई स्टिच गरी एकतृत राख्नुहोस् ।
४. माथि बताइएका सबै कागजातहरुको फोटोकपी र सक्कल लिएर सवारी धनी आफैँ सक्कल नागरिकताका साथ आफ्नो मोटरसाईकलको लट अनुसारको सम्बन्धित फाँटमा जानुहोस् ।
५. फाँटका कर्मचारीले सबै कागजातहरु रुजु गरी, कर/नविकरण तिरेको एकिन गरी सरुवासहमती फाराममा दस्तखत गरी फाँटप्रमुखकहाँ पठाउँछन् ।
६. फाँटप्रमुले सरुवा सहमतीमा प्रमाणित गरिदिएपछि सबै कागजात लिएर पुनः फाँटमा वा दर्ता गर्ने ठाउँ जहाँ तोकिएको छ त्यहाँ लगेर चलानी गराउनुहोस् । चलानी गर्नेले सरुवा सहमती खामबन्दी गरी लाहा छाप लगाइ सिलबन्दी गरिदिन्छन् । उक्त सिलबन्दी खाम बुझेको दस्तखत गरी लैजान सक्नुहुन्छ ।
यसरी सरुवा सहमती चलानी भएको ३५ दिन भित्र लगेर दर्ता गराईसक्नु पर्छ । अन्यथा जरिवाना लाग्छ वा अवधि धेरै भइसकेको छ भने दर्ता नगरी फिर्ता पठाइदिन सक्छन् ।
सरुवा सहमती ल्याई दर्ता गर्दा
अन्य अञ्चलमा दर्ता भएका वा अन्य प्रदेशमा दर्ता भएका मोटरसाईकल सरुवा सहमती ल्याई बागमतीमा दर्ता गराउन तल बताइए बमोजिम गर्नु पर्दछ ।
१. सरुवा सहमती लाहा छाप लगाएको सिलबन्दी खाम हुन्छ । त्यस्तो खाम कतै नखोली यातायात व्यवस्था कार्यालयमा ल्याउनु पर्दछ । खुल्ला आएको सरुवा सहमती वा प्याकेट फुटेको सरुवा सहमती दर्ता हुँदैन ।
२. सरुवा सहमतीको खाम गुर्जुधारामा रहेको यातायात व्यवस्था कार्यालयमा ल्याएर प्रशासन शाखा वा दर्ता अधिकारीलाई खोल्न लगाई दर्ताको लागि तोक लगाउन दिनु पर्दछ ।
३. दर्ताको लागि तोक प्राप्त भए पश्चात् दर्ता फाँटबाट कागजातहरु रुजु गरी एउट एकिन पत्र बनाई दिन्छन् । एकिन पत्र बनाउँदा कुनै कागजातहरु छुटेको वा द्वीविधा भएका विषयहरु छन् भने ती पनि पत्रमा उल्लेख भएको हुन्छ ।
४. जुन कार्यालयबाट सरुवा सहमती ल्याएको हो त्यही कार्यालयमा सो एकिन पत्र पठाएपछि त्यहाँबाट त्यसको जवाफ प्राप्त हुनु पर्छ ।
५. एकिन पत्रको जवाफ प्राप्त भए पछि सवारी धनी सक्कल नागरिकता र मोटरसाईकल लिएर कार्यालयमा जानु पर्छ ।
६. दर्ता फाराम भरेर प्राविधिक शाखामा गई मोटरसाईकलको प्राविधिक निरीक्षण गराएपछि दर्ता फाँटमा गई मोटरसाईकलको लागि बागमती प्रदेशको दर्ता नम्बर लिनु पर्दछ ।
७. दर्ता नम्बर प्राप्त भए पश्चात् सरुवा दर्ता शूल्क रु ५००।- र प्रदुषण शूल्क रु २०।- तिरेको रसिद संलग्न राखी पुनः दर्ता फाँटमा पेश गर्नु पर्दछ ।
८. दर्ता फाँटबाट कागजात रुजु गरी ढड्डा, फाइल तथा ब्लू बुकमा बागमतीको नयाँ नम्बर जनाई फाँटप्रमुखबाट प्रमाणित गराउनु पर्दछ ।
यसरी प्रमाणित भई सकेपछि सरुवा दर्ता सम्पन्न भयो । अब नयाँ नम्बर प्लेट बनाउन लगाई मोटरसाईकलमा जडान गरेर प्रयोग गर्न मिल्छ ।
आफैँ सकिन्छ - आफैँ गरौँ । बिचौलिया मुक्त सेवा प्रवाहको लागि कार्यालयलाई सहयोग गरौँ ।
